唔講大家可能唔知，一般司機係受到《道路交通條例》規管，有乜行差踏錯都會被執法人員告到甩褲，不過港鐵員工就唔同嘞，受規管所依據嘅係《香港鐵路條例》。兩套條例嘅具體內容有乜分別呢？請恕功夫茶唔係金牙大狀之類嘅法律專家，所以講唔出個所以然來，不過有一件事係幼稚園學生都聽得明嘅，就係《香港鐵路條例》自從○七年生效以來，特區政府從來冇引用過相關法例懲罰犯錯嘅港鐵員工！
正如運輸業界人士話齋，路上司機唔用免提裝置講手機已經係違法，之但係鐵路車長就算被揭發不專心駕駛，例如剪腳甲、玩手機等等，都只係接受內部處分，好唔公平之餘，亦未能保障乘客安全。你知啦，一架列車載住好多人o架，萬一出事後果不堪設想。
因乜事幹功夫茶今日會提到兩套截然不同嘅條例呢？實情係咁嘅，今年五月天水圍一架輕鐵列車懷疑超速出軌，造成七十七人受傷嘅特大事故，警方已經完成調查嘞，並且將調查報告呈交律政司徵詢意見。消息指出，警方不排除檢控肇事車長，問題係若然真係檢控，究竟係引用《香港鐵路條例》，定係《道路交通條例》？事關輕鐵部分軌道同路面交通共用，嚴格而言兩套法例都有權規管，最終要由律政司決定點樣執法。
假設係引用《香港鐵路條例》，並且成功定罪，由於事故屬於港鐵可控制範圍，導致當日服務延誤超過八小時，港鐵有可能需按懲罰機制被罰最高嘅一千五百萬元，罰款用作明年車費優惠回饋乘客。
即係咁，功夫茶衷心希望官老爺依法辦事，唔好破壞香港行之有效嘅法治精神，既然《香港鐵路條例》設立嘅原意就係規管港鐵員工，點可能長期由得佢如同虛設呢？○七年條例生效至今已經六年啦，居然連一次都冇用過，你唔會話港鐵員工六年以來從無犯錯啩。
事實上咯喎，根據運房局交通投訴組嘅數字顯示，涉及港鐵員工嘅投訴及建議有上升趨勢，由○八年十七宗按年上升至去年四十宗，今年頭三個月已有十一宗，性質包括未待乘客安全上落車就開車，以及突然煞車等等。喂，今次講嘅係輕鐵出軌傷人咁大鑊，如果仍然唔引用《香港鐵路條例》嚴懲港鐵公司，仲對得住法治之區呢一個金漆招牌咩？仲對得住香港市民咩？
講開又講，特區政府對於港鐵公司實在太仁慈嘞，任由佢哋年年賺大錢仲要不斷加價，若然輕鐵出軌都唔重罰，好容易犯眾怒o架！