早前傳出政府會委任南區區議員馮煒光出任新聞統籌專員（IC），令外界議論紛紛，批評聲音佔多數，又話佢做IC嘅機會微乎其微。不過，近日我哋聽到消息話，政府會於未來一至兩個星期內公布有關任命。馮煒光尋日接受查詢時話，佢冇聽過呢件事，又話相信政府依家未得閒處理喎。至於提到佢嘅金句「三個字：不予置評」，佢就話大家開心吓咪幾好，如果有得收版權費嘅話，好多議員都要畀錢佢添。
馮煒光又為金句「三個字」解畫，佢話原本想講「不置評」，但口快快講多咗隻字，不過最緊要冇講錯意思咁話。至於有冇因應傳聞為出任IC做好準備呢？佢就話，最近不時要去醫院照顧爸爸，冇乜時間準備，又話好在佢將自己手持公關公司嘅股份畀晒細佬，而公司又好遷就佢，所以攞假先冇問題喎。