政情：五千蚊收買白鴿命

開會上堂外訪辦活動

該黨為咗下屆立法會選舉定咗張八人重點培訓名單，尋日由培訓計劃負責人單仲偕帶住八隻鴿出來公布詳情。八人分別係林卓廷、蔡耀昌及六名區議員包括屯門陳樹英、葵青尹兆堅、元朗鄺俊宇、南區柴文瀚、區諾軒及羅健熙。雖然該黨話名單同選舉冇直接關係，但各人已經分晒區起動，當中乳鴿羅健熙仲負責晒全港、為選超級區議會鋪路。

該黨度咗五招重點特訓呢八隻老、中、青白鴿，包括要佢哋列席每周立法會黨團會議、上特訓班學習回應傳媒技巧、安排佢哋做唔同政策範疇嘅發言人、輪流出席電台論壇節目博曝光、海外訪問同舉辦地區活動，該黨最後會以曝光率作為評核準則。據了解，該黨所謂嘅資助只係每月實報實銷上限五千元津貼咁大把。

搞蛇齋餅糉都唔夠用

有乳鴿呻話，所謂五招特訓都只係整色整水，津貼得嗰五千元，搞蛇齋餅糉都唔夠，除咗用來賣小巴廣告外，都唔知做得乜。至於做政策發言人，傳媒要搵都搵咗黨內嘅立法會議員先啦，點會搵佢哋吖，要見報始終都係要靠自己諗計。講到計算見報率就更加「懸疑」，事關見報率多唔代表反應一定正面，負面新聞唔通又計入成績表咩？

不過，班乳鴿最頭痕係要參加特訓班，特別係要強制性出席「星期六學堂」，聽該黨有「大腦」之稱嘅羅致光講解政治、福利、民主哲學等知識，如果出席率不足六成就分分鐘要被訓誡。有乳鴿無奈話，佢哋星期一至五都要做地區工作同開黨內會議，星期日又要落區，只剩下星期六可以抖吓，但依家都話要用嚟上堂，真係做到氣咳囉。