政情：狄志遠一腳靚波 幫林鄭解圍

唔少女士都會貪靚着高跟鞋，政務司司長林鄭月娥都唔例外。尋日林鄭出席理工大學「貧窮多面睇」活動開幕禮時，有請願團體送上一個小型龍門同足球畀佢，希望佢將個波踢入龍門，以象徵政府會訂立滅貧目標，出招一擊即中。着住高跟鞋嘅林鄭就顯得尷尷尬尬，點都唔肯踢，最後就由主辦機構之一、基督教香港信義會社會服務部總幹事狄志遠幫林鄭解圍，一腳踢個波入龍門。