商務及經濟發展局前局長馬時亨（肥亨）喺政商界人脈甚廣，好多時都會互相幫忙，佢尋日就幫澳洲會計師公會舉辦嘅高峰會擔任講者。肥亨一到場就不停搵其他講者，話要夾一夾論壇嘅流程，雖然咁忙，但都記得在場一班記者，向記者大派卡片。當肥亨揭開個卡片套，原來內有乾坤，皆因佢準備咗三種唔同嘅卡片，分別係香港大學名譽教授、農業銀行董事及中國移動集團外部董事，真係派極都唔完。其實佢仲係好多間公司嘅非執行董事，如果張張卡片都帶出街，真係唔知個卡片套要幾大個先夠裝喇！
