政情:中環出更:「唐宮」帆布密冚 惹重建疑雲

前政務司司長唐英年位於九龍塘約道大宅嘅僭建地庫復修工程已進行多時,最近有人向卓妮報料,發現唐唐大宅有異動,見到有帆布遮蓋整幢建築物外牆,包到實一實,令人懷疑工程並非填平「地下唐宮」咁簡單,甚至乎質疑係咪想拆卸重建添!不過,唐唐嘅發言人重申,工程按照當局批出嘅復修工程進行,有帆布封住係為工程安全着想喎。

工人拒透露復修進度

卓妮親身到場了解唐唐大宅復修嘅最新情況,正如報料人所言,依家大宅搭建咗棚架,然後有帆布遮蓋建築物外牆,另外就係部分已拆卸嘅石屎同鋼筋棄置在一旁。對於工程進度,現場工人不但守口如瓶未肯透露半句消息,見到陌生人行近大宅拍照更會加倍警惕,有保安人員出言喝止,有工人甚至用相機反拍。雖然唐唐大宅復修工程持續有進展,然而完工時間表卻眾說紛紜,有人推算最快本月底就可以完工,但就現場所見,似乎明日起貨都無乜可能,估計距離完工仲有一段時間。

卓妮

第一手消息請下載on.cc東方互動iPhone/iPad/Android/Windows Phone Apps