政情:梁美芬:政改勿「行掘頭路」

由立法會議員梁美芬牽頭成立嘅「華人學術網絡」,原定上月舉辦政改研討會,但就因為佢老公突然腰椎盤痛到入咗醫院,先令佢要被迫取消研討會。事隔一個月後,梁美芬捲土重來舉行政改研討會,仲邀請到「幫港出聲」核心成員鄭赤琰同何濼生等大學教授出席。

倡增提委會認受性

雖然梁美芬喺研討會上就提名委員會組成辦法同《基本法》內有關普選條文講咗成個鐘頭,但佢講嘅所有嘢都係近期好多人都有提到嘅論點,包括普選要依照一國兩制及憲制基礎,唔好「行掘頭路」討論有違《基本法》原意嘅公民提名方案。

佢又建議政府喺諮詢文件中擴大提委會四大界別嘅選民基礎,以增加提委會認受性。

何濼生就重申提委會要有實則提名功能,建議政府容許十八區市民一人一票選出提委會成員代佢哋提名特首候選人。

另外,經濟學者曾淵滄亦都建議部分提委會成員以「公民提名」方式產生,咁除咗可以確保提委會有足夠認受性外,亦直接擴大提委會界別選民基礎,可謂一舉兩得喎。

第一手消息請下載on.cc東方互動iPhone/iPad/Android/Windows Phone Apps