政情：「變形金剛」與「李超人」惺惺相惜
《變形金剛4》近日來港取景，但變形金剛尋日竟然遇上香港「超人」！李嘉誠基金會尋日喺社交網站上載咗幾幅相片，其中一幅係「李超人」長實主席李嘉誠同主演《變形金剛4》嘅男主角麥克華堡（Mark Wahlberg），坐喺李嘉誠辦公室嘅梳化言談甚歡，究竟兩人傾咩咁開心呢？
同樣設基金會助人
據基金會透露，原來佢哋傾緊大家嘅童年，因為麥克華堡曾有過艱苦嘅童年，所以依家都成立咗個基金會，幫助基層青年人圓夢，而李嘉誠亦透過基金會幫人，所以兩人可算係惺惺相惜。
至於咩原因促成今次會面呢？基金會話，身兼基金會成員嘅和黃財務董事陸法蘭係認識麥克華堡，咁啱麥克華堡嚟香港拍戲，所以李超人同變形金剛主角就互相見面喇！唔知佢哋今次見面之後，雙方基金會有冇合作機會呢？