中環出更：討論公民提名 黃友嘉：嘥時間
自從學民思潮提出公民提名方案，唔少泛民主派，包括真普選聯盟（真普聯）都力推公民提名，但中華廠商聯合會前會長、港區全國人大代表黃友嘉尋日出席立法會議員劉慧卿嘅網台節目時，就講明討論公民提名係冇實質意義，因為唔好講建制派，其實泛民之間對此都無共識，所以唔好嘥時間討論嘞。
與卿姐談普選
黃友嘉話，現時機制並無公民提名，所以講呢樣嘢其實無乜實質意義，唔會促進共識。至於政改方案，佢就認為無論泛民定建制都想香港普選向前走，但係有一個底線，就係唔可以同中央對抗。佢建議落實兩樣嘢，首先係完善中央任命權同罷免權，喺法律寫明罷免機制，以及成為特首候選人之前，要宣誓維護國家憲法及《基本法》。
卿姐即刻問，要維護國家憲法，係咪等同「一國一制」？黃友嘉就反駁，指香港係特別行政區，要表明唔傷害或違背國家憲法係理所當然，唔明有乜好爭議喎。對於近日有泛民人士勾結台灣政治人物參與佔領中環行動，黃友嘉認為無咁嘅需要，亦好無謂，事關此舉會影響香港同中央嘅互信。
卓妮