財政司司長曾俊華（鬍鬚曾）早排去咗美國訪問，但係正值共和民主兩黨就調高債務上限爭論不休，搞到聯邦政府部分部門都要關門。雖則鬍鬚曾個團無受影響，但係就搞到佢其中一個「習慣」要斷纜啦！事緣佢有鋪「集郵」癮，講緊嘅係同人拍合照再放上網。今次訪問，佢曾經去某個部門嘅總部同高層官員會面，相就有影，但係人哋就講到明唔好公開，皆因按照當地法律，其實嗰名官員應該係放緊假喎。
雖則上個禮拜兩黨傾掂數，政府服務回復正常，但係鬍鬚曾都有感而發，因為其實今次國會通過嘅法案，只係將美國舉債能力維持到明年二月七日，同樣嘅爭拗好快又會出現，國債話咁快就會超過十七萬億美元。
鬍鬚曾話，金管局早前宣布計劃明年推出「穩定資金措施」，相信會有廿家銀行或有需要增加資金規模，而現時市場上七千五百億港元嘅外匯基金票據，應該足夠做抵押品，從金管局獲取港元流動資金。不過，佢都話「解鈴還須繫鈴人」，希望美國聯儲局盡快處理好呢個爛攤子。