政情：入股老牌公司 「榮」升電影出品人
政壇人事，眨眼幾番新。漸漸淡出青年工作嘅菁英會創會兼榮譽主席施榮忻（ Jaime）都搖身一變做電影出品人，今年初投資八位數字，入股有逾三十年歷史嘅銀都機構有限公司。銀都係一間香港電影公司，近年拍過唔少大片，好處係紅色背景強，多年來拍住內地多家電影公司齊搵食。近年內地經濟起飛後，精神食糧不可或缺，電影文化產業被「欽點」大搞，泊到「銀都」呢個「碼頭」，真係「錢」途無限。
睇好內地市場
向來幫手打理家族生意嘅Jaime，開過公司賣紅酒，過去八年專注青年工作，除幫菁英會做開荒牛，仲係百仁基金前主席，搞生意，一向係玩票性質。今次投身電影界，Jaime承認對電影唔多熟，但睇準內地富人漸多，兩餐不愁之餘，自然想搵娛樂填飽大腦，加上神州地大人又多，一套喺香港收三千萬元票房嘅戲，入到內地播兩播，閒閒哋收三億元人民幣。所以佢志不在小小的香港票房，拎晒中港播映權，先係生金蛋生意。佢入股後嘅頭炮，係兩部同中港著名演員合作嘅新戲，年底上畫，其中一部尋日喺北京開記者會，Jaime首次以出品人身份現身，同演員有講有笑。
不過投資電影，也考運氣。Jaime話就算套戲大賣，若成本超高，賣個滿堂紅都未必帶挈出品人賺大錢，相反一套爆紅嘅低成本製作，反而賺到笑。
稱唔會拍鬼片
咁拍乜戲最賺錢？Jaime話好多戲都想拍，但有一類一定唔拍，就係鬼片，事關佢好細膽喎。佢話要開戲，首選科幻同懸疑片。但現階段佢仍係外行人，唔想恃住投資者身份指東指西，阻住地球轉，更加唔會粉墨登場。
講番青年工作，Jaime依家只剩下做咗八年嘅福建社團聯會青委會主任一職，任期下月八日亦屆滿。卸埋任，佢就全身告別「青年幫」。不過Jaime得三十八歲，難怪佢賣關子話，有合適崗位，唔介意服務社會。全國青聯副主席之位就快換屆，四十五歲以下者都可競逐，話唔定Jaime兜個圈抖抖，再戰江湖都未定。