中環出更：老婆下令 鄧家彪跳減肥舞
韓國著名藝人兼運動健身教練鄭多燕因為成功減肥而聞名全亞洲，佢之後將呢套自創嘅減肥健身運動命名為Figure Robics，吸引唔少港人上網睇片跟住佢跳。政圈中人經常要出席大小場合飲宴應酬，食到肚腩凸凸在所難免，立法會議員鄧家彪（Bill）家有賢妻，佢番屋企後就會即刻畀老婆捉住，叫佢模仿鄭多燕跳番十幾分鐘減肥舞。
勞工界前立法會議員鄺志堅五年前因出席太多酒會而患上脂肪肝，要即刻控制飲食減肥。同係勞工界嘅阿Bill話自己平日放工後連休息嘅時間都唔係好夠，更加唔好講有時間做運動，所以佢放假時會抽時間同老婆、囡囡行山，咁就可以乘機減肥之餘，又可以一家三口享受天倫之樂。
宴會節食有妙計
其實阿Bill仲有另一個減肥秘訣，就係盡量安排自己一晚走兩場宴會，去第一場時會先同主辦單位講話自己仲有下一場要去；而去到第二場宴會時，佢就用喺上一場已經食咗好多嘢嘅理由謝絕不斷狂食，咁就可以去晒兩個活動之餘，又唔會因為食得太多而搞到身體極之唔健康。
卓妮