中環出更：彭徐美雲卸任迎「登六」
女童軍總會日前選出名譽副會長何超鳳（Daisy）當選新一任香港總監，明年四月底就會接替現任嘅彭徐美雲。尋日彭太同老公彭曉明拍住拖現身跑馬地馬場，為佢哋一家共同擁有嘅愛駒「羅馬神駒」打氣，愛駒最後跑第三。卓妮問彭太卸任後有乜大計？佢笑言要準備「登六」喎。「登六」即係乜？咪係迎接六十歲囉！
明年搞活動慶60大壽
尋日彭太以新髮型加橙色套裝裙現身，令人眼前一亮，莫非佢搵到接班人後放下心頭大石，所以連精神都好咗？彭太話，雖然佢唔再做總監，但「一日女童軍，一世都係女童軍」，未來會繼續留喺會內協助會務。
佢話，一向都覺得Daisy好好，所以當日佢同副會長蔡關穎琴一齊提名Daisy做總監，結果對方以高票數當選。而彭太自己，就準備明年「登六」，即係六十大壽，佢自言呢件係喜事，諗住搞活動慶祝一番，睇嚟佢仲有排忙喎。
除咗彭生彭太入馬場晒溫馨之外，SML集團主席孫少文夫婦、「福建幫頭領」盧文端同太太、長女盧金治（Esther）及兒子盧金榮一家四口都入嚟湊熱鬧，佢哋有隻馬出賽，叫做「福建精神」，不過最後三 甲不入。
Esther話身為中華廠商聯合會副會長嘅丈夫吳永嘉要開會，所以冇得一齊入嚟喎，唔通係為咗年底嘅工展會而忙碌？吳永嘉連星期日都開會咁勤力，卓妮真係寫個服字。
卓妮