Party Life：喜結良緣

前商務及經濟發展局局長馬時亨大女馬露明前年出閣，日前輪到細女馬露玲披上嫁衣，下嫁新加坡籍律師符傑廉。

一對新人上周六於教堂行禮，兩日後再喺中環四季酒店擺三十三圍喜酒，之後赴歐洲度蜜月。婚宴場地以新娘子喜愛嘅粉紅色為主，浪漫滿瀉。涉足政商界多年嘅馬時亨人緣佳，婚宴上，政商名人紛紛到賀，整晚賓客如雲，星光熠熠，齊見證一對佳偶步向人生另一階段。

特首梁振英（左）向再度榮任外父嘅馬時亨（右）握手道賀，於婚宴中坐足兩個多小時至離開。	「玩具大王」蔡志明（左）同太太蔡李惠莉（右）就快娶新抱，呢晚先嚟賀兩位新人。（溫國佳攝）	英皇集團主席楊受成喺百忙之中都抽空出席婚宴。
前財政司司長梁錦松（左）邊行邊輕扶太太伏明霞（右），非常體貼。	有「殼王」之稱嘅商人陳國強（右）與太太伍婉蘭（左）嘅衣着襯到絕。	新鴻基地產聯席主席及董事總經理郭炳江親身到場，並送上誠摯祝福。
退休後深居簡出嘅前運輸及房屋局局長鄭汝樺，當晚特意恤個靚髮赴宴。