中環出更:「廟」筆成「獅」保存歷史

香港地方雖小,但各式各樣嘅文化遺產唔少。致力保育本地文物嘅衞奕信勳爵文物信託,半年前搵來本地著名珠寶設計師陳瑞麟(Dennis),以廟宇吉祥物為靈感,設計咗一對各值六十多萬元嘅「天喜獅」吊墜項鏈作慈善義賣,限量發售十八隻。尋日新任受託人委員會主席方文雄(David)同理事會主席何培斌齊現身宣傳一對獅子,藉此籌募更多營運經費。

喜愛研究廟宇文化嘅Dennis話,佢每逢周末都會駕車到鄉郊觀賞廟宇建築,尋找創作靈感。有次佢睇到一間廟宇屋簷上嘅獅子,靈感即如泉湧,用三個月就完成「天喜獅」作品。除咗廟宇之外,Dennis亦深被扒龍舟嘅文化吸引,最鍾意睇人演唱「龍舟歌」,佢話好想呢啲傳統一路承傳落去。

David透露,政府現正就古蹟保育方面進行諮詢,希望喺不久嘅將來能夠注資予該信託,讓更多本港文化得以保存。David認為,口述歷史最急需要保存,上一代嘅奮鬥史實在好值得後人借鑑。佢笑言,會考慮為爸爸方潤華記錄口述歷史,事關爸爸對家族及地區嘅影響力唔少,其經歷係無價寶喎!

「天台屋」具特色值研究

何培斌就話,「天台屋」雖然係非法僭建,但確實係本港存在已久嘅特色住屋,好值得研究。受託人委員會成員季玉年同譚錦球都喺度,佢哋都好欣賞「天喜獅」嘅設計,譚錦球仲即時買咗一隻送畀太太,真係Sweet。

卓妮

第一手消息請下載on.cc東方互動iPhone/iPad/Android/Windows Phone Apps