政情：錶王隻錶「誤差」五分鐘
鐘錶界「老行尊」孫秉樞縱橫業界六十年，見證業界發展。鐘錶講究精準，但係孫秉樞隻錶永遠快五分鐘，目的係提防遲到。市面有先進腕錶設電波時計（Radio Controlled），特色係每日凌晨會接收來自發射站發出嘅原子鐘調校訊號，令隻錶零誤差，不過就唔啱佢嘞。
「錶王」嘅至愛，原來係一隻仿製品。孫秉樞最威水時打理兩隻名錶，高峰時銷量佔成個市場超過一成。功勞咁大，鐘錶商對佢十分敬重，於是送咗一隻珍藏於博物館嘅經典皇室懷舊陀錶畀佢，不過係仿製品，自此呢隻陀錶成為「錶王」至愛嘅收藏，逾半世紀不離不棄。
「豬油馬拉糕」暢銷靠食腦
孫秉樞話，六十年前佢加入一間英資洋行嘅鐘錶部門，當時洋行代理嘅芝柏表（Girard Perregaux），銷情一直欠佳。事關隻錶譯名叫「芝拿柏利高」，被行家笑稱係「豬油馬拉糕」，後來佢取兩個英文字首，改名叫芝柏表，從此隻錶賣到老細都識笑。所以話，做邊行都好，最緊要用腦。