探射燈：DIY洗頭水甩髮不可收拾
DIY洗頭水隨時洗到狂脫髮！內地近日傳出市面部分洗頭水含有聚二甲基矽氧烷（又稱矽油），長期使用會導致毛囊發炎。最近網絡上便流傳多張自製洗頭水秘方，其中聲稱將檸檬汁、甘油、精油等「溝來溝去」，便可弄出令秀髮柔順的純天然洗頭水，吸引不少網民倣效。本報邀請學者測試有關配方，雖然酸鹼度合格，但因過程中要加熱，恐會令洗頭水變質產生化學作用，影響頭髮健康。有醫學界人士直指，食用材料及化工原料的品質不穩定，隨時會令洗頭水濃度過高，以往有使用自製洗頭水的女士弄至頭皮發炎及脫髮，若長期使用，嚴重更會「寸草不生」。
「好驚啲洗頭水有好多化學物質，愈用愈甩頭髮。」二十多歲的張小姐近年被脫髮問題困擾，試用坊間多款洗頭水，仍未能改善問題，直至聽聞有朋友使用自製洗頭水，聲稱有效護髮，她亦心癢癢轉投DIY行列，「啲材料好易買又平，上網睇住啲配方左溝右溝就搞掂，幾分鐘唔使。」網上亦有不少網民直言自製洗頭水好處多多，「用完有啲乾，不過梳番順佢就好爽」、「對皮膚好啲，仲可以減少污染」，惹來不少網民熱議。
為測試DIY洗頭水的安全性，記者將網上流傳的多款自製洗頭水配方及材料，交予香港專業教育學院（沙田）應用科學系講師周卓峰進行測試，了解各款自製洗頭水的酸鹼度。周指，科學上將酸鹼度分為一至十四度，七度為中性，七度以下或以上則分別為酸性及鹼性，而人體皮膚酸鹼度一般約五至六度，若自製洗頭水的酸或鹼過高，均會對皮膚造成傷害，導致油脂分泌不平衡，毛孔閉塞，造成污垢。
愈洗愈痕致頭皮發炎
周測試的四款自製洗頭水，包括檸檬洗頭水、蛋白洗頭水、啤酒洗頭水，以及由檸檬酸、水、甘油、精油混合而成的洗頭水，「先將檸檬榨汁，分量約六大匙，再加水六大匙、甘油兩大匙，精油二十五滴，你睇到呢啲成分溝埋後質感好稀，唔似平時用嘅洗頭水。雖然酸鹼度結果係五，對皮膚無刺激性，但咁樣溝嚟溝去，會產生化學作用。」他亦試驗了檸檬洗頭水及蛋白洗頭水，分別將檸檬汁及蛋白加入日常使用的洗頭水中，攪拌均勻，酸鹼度同樣為五。「另外呢款將啤酒同洗頭水以一比一比例混合嘅洗頭水，要一邊攪拌，一邊加熱至攝氏七十度，溫度嘅改變亦會令洗頭水變質。」
自製洗頭水所產生的化學作用，原來會令頭髮愈洗愈甩。皮膚科專科醫生史泰祖指，若鹼性物質混合含礦物質的水喉水，會形成沉澱物，產生頭皮；而蛋白混合洗頭水，亦因蛋白沒有防腐劑，故難以保存，易令頭皮感染細菌，脫髮情況更嚴重。
「有時有機物質都係噱頭多過真正效用！」皮膚科專科醫生侯鈞翔表示，食用物質的穩定性未必能準確控制，「啲蛋有不同大小，蛋白有幾多亦唔同；檸檬有不同產地，檸檬酸的含量亦不一致，混合之後係咪安全，夠唔夠精確，難以確定。」他指，坊間洗頭水會經過實驗室測試，估計對皮膚有多大的傷害才推出市面，「有啲人溝完（自製）洗頭水後會水還水，渣還渣，仲有一啲結晶體，呢啲就係溝錯咗。」
侯說：「過往有女病人因用了自製洗頭水，個頭愈來愈痕，更加出現發炎情況，頭皮多咗，亦有脫髮危機，如果再嚴重啲就可能冇得救。」他表示，精油、酒精原先就是一種對皮膚有很大刺激的物質，而甘油亦有工業用及人體用之分別，如不慎購買工業用或來歷不明的材料就會對頭髮造成嚴重損害。
中藥洗髮治標不治本
近期亦有不少內地網店趁機推出自製洗頭水，標榜使用天然原料，例如當歸、首烏、老薑、靈芝、人參等煲製而成，價錢由十多元至四十元人民幣不等，更有自製洗髮水的原材料出售，包括側柏葉等，價錢只需八元人民幣，聲稱清潔力強，更不會致癌。
香港中醫師公會會長關之義則稱，以上提及的中藥都有護髮功效，但若然烹調時間及方法不同，隨時弄巧成拙，「功效唔係產品講到咁神化同誇張。」他指，中藥洗髮只能治標，內服藥才能治本，必須由身體的根本治療出發。
圖：崔祖佑、梁偉恩
文：周詠欣