引路帶「被消失」 視障者買餸難

為符合《殘疾歧視條例》規定,食環署轄下大部分街市已增設觸覺引路帶,但本報發現不少街市通道長期被放置貨物,令引路帶儼如「斷截禾蟲」,對視障人士構成不便甚至危機,眾多街市中,尤以柴灣街市及青衣街市情況最為嚴重。關注團體與區議員均批評食環署管理不善,令引路帶無端「被廢武功」,要求從速改善。

「有引路帶我哋就可以自己行入街市買嘢,唔使搵人帶路,但近呢幾年條引路帶成日畀啲貨遮住,已經撞親過幾次!」視障人士阿發(化名)坦言,當年得悉柴灣街市增設觸覺引路帶曾以為從此即可自行前往街市,未料近年愈來愈多攤檔佔用通道擺放貨物,令引路帶突然中斷致前無去路,甚至多次因碰到貨物而受傷。

有設施難使用 浪費公帑

無獨有偶,陳女士亦不滿青衣街市通道長期被阻,令觸覺引路帶形同虛設,「屋企有人有視障,有時佢想自己落街市買少少嘢都唔得,政府又話要搞咩無障礙城市,點知連自己地頭都管唔掂!」陳指食環署雖在街市增設觸覺引路帶,卻因管理不善而令有需要人士得物無所用,直斥食環署嚴重失職兼浪費公帑。

「食環署成日都覺得呢啲設施好少人用,影響唔大就隻眼開隻眼閉,其實青衣邨已經有成廿年歷史,居民對無障礙設施需求會愈嚟愈大!」葵青區區議員陳笑文狠批食環署無視傷健人士需要,未有對違規檔戶嚴厲執法,令無障礙設施形同虛設。

突然冇路行 唔敢去街市

香港失明人互聯會復康教育專員吳家麟則說,引路帶突然被阻或中斷均會對視障人士構成危險,認為食環署有責任積極改善問題,「曾經有視障人士同我哋講,話以後唔敢自己一個人去街市,因為引路帶會突然有嘢阻住,唔單止唔方便,仲好危險!其實貨物擺出界已經係犯規,真係唔可以縱容商戶鬥霸地!」

食物環境衞生署發言人承認,今年一月至今已接獲十一宗柴灣街市檔戶貨物阻塞通道投訴,至於青衣街市則有三宗,已分別向違規檔戶提出廿九及兩宗檢控。發言人強調,一般街市通道闊度不應少於一米,通道上不應有阻塞物,而觸覺引路帶設於通道適當位置,一旦發現檔戶佔用公眾地方造成阻塞,會先發出口頭警告,若無效會作出檢控。

記者:何穎賢、陳倩儀

第一手消息請下載on.cc東方互動iPhone/iPad/Android/Windows Phone Apps