中環出更:被問又換律師 大劉目露兇光

捲入澳門世紀巨貪案嘅華人置業主席劉鑾雄(大劉),一直稱因病而拒絕到澳門受審,但佢喺香港就健步如飛,尋日如常喺秘書陪同下去灣仔富豪飯堂食晏。當記者問佢點解又撤換律師時,大劉一言不發,並表現一副目露兇光嘅樣子,而佢嘅秘書就登時望住記者,之後佢哋好似就問題若有所思咁行入飯堂,認真耐人尋味。

保安「霸道」 故態復萌

尋日中午十二時三十分,穿着深藍色長袖外套嘅大劉,同秘書一同坐車抵達灣仔富豪飯堂,現場一早有三名保安做好迎接準備。由於大劉抵達時剛好沒有途人經過,可順利迅速進入飯堂,佢嘅秘書則隨後入內。事隔一個多小時後,即約下午一時四十五分,大劉同秘書準備離開,曾因「霸道」攔路陣勢惹來途人不滿嘅多名保安,尋日一見大劉準備離開時又故態復萌,即使有途人過路,保安都無特別讓路。

期間有一名途人更八卦詢問係邊個出嚟?另一人回答話:「好似係大劉!」然後就睥住企喺飯堂內嘅大劉。唔知大劉係咪自知「霸道」,見佢同秘書企喺飯堂內等咗五秒,以乎係想等待幾名途人過路後才步出飯堂。當被問及係咪以後都唔敢去澳門時,大劉無回答就同秘書一同登上座駕離去。

卓妮

第一手消息請下載on.cc東方互動iPhone/iPad/Android/Windows Phone Apps