政情：許華傑「食石仔」 終須割膽

膽石，唔淨只襲擊「三高一族」，瘦到好似「紙板人」一樣嘅中華出入口商會副會長許華傑（Michael），一樣中招。佢尋日喺社交網站facebook上載一張留院相。Michael留言話，「不割不割還需割，昨天終於把膽割咗」。佢展示一樽醫生留下嘅「手信」，膠樽內裝滿大堆細小膽石，連醫生都忍唔住笑佢，幾時食咗咁多石仔落個膽。Michael八月中已因胃痛漏夜入院，一照之下發現個膽發炎，膽石更不少，醫生惟有引刀一快，將個膽割埋。依家割膽石已經唔係大手術，Michael康復神速，雖然仲吊緊鹽水，但識得玩自拍自娛一番，抖多兩、三日就出得院嘞。