中環出更：舅仔加讚結婚 馬鴻銘送金器
尋日沙田馬場有賽事，城中名人入場輕鬆吓。「玩具大王」蔡志明嘅大女婿馬鴻銘（John）單拖入場，佢話細仔Kaden出世啱啱過咗百日，一對孖仔就兩歲幾，加埋已經五歲幾嘅大女，四名小豆丁好熱鬧。講起舅仔蔡加讚（Karson）將於下月底結婚，依家Karson乜都有，送咩禮物畀佢都幾頭痛。好彩阿John呢位姐夫早有打算，佢話：「送金啦！」仲話婚禮最啱送金器，依家金價回落，好抵買。
啱啱飲新抱茶嘅康泰旅行社董事長黃士心，同好少公開露面嘅哥哥Jimmy亦有入場。佢話哥哥移民海外三十幾年，今次特登返港參加囝囝黃進達婚禮。做咗幾日新老爺，滋味如何？佢笑呵呵唔識答。佢又話阿仔同新抱正在韓國度蜜月，因為之前去當地影婚紗相未有時間認真咁玩，所以趁蜜月去玩番夠本喎。
王麗霞出閣 笑稱忘婚期
家有喜事嘅仲有港區全國人大代表王庭聰，佢囡囡王麗霞（Crystal）本月廿八日將喺印尼峇里島舉行夢幻婚禮，尋日Crystal同哥哥Benny及一班朋友入場捧爸爸名下愛駒場，可惜三甲不入。問Crystal待嫁心情緊唔緊張？佢就笑笑口話，唔講都唔記得係今個月辦喜事添！做股匯投資嘅Benny話，最近印度、印尼及巴西陸續加息，佢提醒股民小心泡沫爆破，到時香港將難以獨善其身。
卓妮