政情：留學有成 局長「蘇」廚藝
廚房向來都係女性嘅天地，但中華廠商聯合會（廠商會）副會長吳永嘉（Jimmy）尋日就孖住商務及經濟發展局局長蘇錦樑（Greg蘇），齊齊着起圍裙喺香港食品嘉年華表演烹飪，笑料百出。Greg蘇即席示範炮製至愛嘅泰式牛肉沙津，又大爆當年出國留學時經常都會喺學生宿舍煮番幾味撚手小菜。
吳永嘉協助被嘲手腳慢
Greg蘇煎牛扒期間，Jimmy就好小心咁喺隔籬幫手搣菜，點知被主持人寸佢動作慢局長一截，其實佢之前已經被飲食主持蘇施黃笑佢入廚雞手鴨腳，唔通佢真係好少入廚房嘅？Jimmy笑笑口話，佢唔係好少入廚房，而係唔入廚房。咁係咪太太全權掌廚呢？佢就好老實話：「我咁耐都係食過佢（太太）一味糖醋排骨咋！」明晒！
Greg蘇就透露，多年來無乜機會入廚房煮嘢食，皆因蘇媽媽由細都大都唔准佢入廚房，驚佢發生意外。直至Greg蘇出國留學前幾日，蘇媽媽突然拉佢入廚房，話要教佢煮幾味餸，等佢去到加拿大可以「食自己」。加拿大留學期間，Greg蘇成日都會自動請纓下廚炒餸，最大原因就係佢唔想洗碗喎。