中環出更：窺探朝鮮 陳光明有「機」唔通
神秘國度北韓，外界一直所知甚少。繼旅遊作家項明生到北韓探秘後，潮青名譽參事陳光明（Johnny）日前就以香港青年才俊朝鮮訪問團副團長身份，帶隊揭開北韓神秘面紗。由於佢以貴賓身份入境，於是成功打破禁忌，獲准帶手機闖關。不過，朝鮮軍官就話嗰度係無手機網絡，就算有手機都打唔通，所以Johnny將手機當相機用，斷絕同外界聯絡。
獲准帶電話 歎「火水燒蜆」
Johnny此行同十幾位商界才俊同行，團友均獲貴賓式接待。初次訪北韓，感覺似回到七十年代嘅中國，Johnny驚覺當地人求知慾好強，不時好奇問佢哋到底香港係點嘅？香港人又點睇朝鮮？一般外界認為遊覽北韓應該禁忌多多，但佢去到板門店、三八線參觀，都係照樣用手機影相，總之去到邊影到邊，惟獨去到軍事設施範圍，軍官就提示唔准影相，又經常糾正大家，呢度唔係叫「北韓」，應該要叫「朝鮮」先啱喎。
當遊覽完畢後，接待單位人員預備咗豐富美食，包括即場炮製煮蜆，每隻蜆好似拳頭咁大，工人喺地上排好蜆陣後淋上火水再點火，一陣火光熊熊後，啲蜆眨眼間就熟晒喇。呢種食法，香港人可能覺得怪怪哋，但Johnny就大讚夠創意、有風味，照食可也。佢又發現北韓商機處處，會諗吓投資玩具同製衣業都未定喎。不過，北韓局勢咁唔穩定，早排啲廠商曾被飭令要撤離，所以要到當地投資真係要好夠膽識至得。
卓妮