苦媽淚求兄弟能合葬
【本報訊】「死唔係問題，咁邊個最淒涼呢？」單親媽媽陳笑琼的兩名兒子半年內相繼為情自殺，剩下她孤單隻影，每日含淚獨守亡子的靈位，道出一名母親的肺腑之言，她寄語年輕人要珍惜生命，在萌發死念的時候要想到親人更淒涼，「命得一條o架咋，死咗乜都冇！最傷心永遠都係父母同屋企人。」琼姐雖然遭受連喪兩子之痛，但她仍深信生命可貴，會堅強走下去，她考慮將兩子骨灰龕安放在一起。有見阿琼經濟出現困難，太陽報愛心基金將再次撥款協助購買其大仔的骨灰位。
兩兒子相繼為情自殺
琼姐的大仔盧偉鵬（卅二歲）今年二月情變，割脈上吊雙料自殺，陳屍四日後始被揭發，想不到阿琼喪子傷口未愈，細仔盧偉俊（廿六歲）大前日與同居女友分手後，在深水埗劏房吞安眠藥及燒炭雙料自殺絕命，令她的傷口被灑上鹽巴。
琼姐昨晨在彩德邨寓所內上香拜祭愛兒，計劃會將阿俊遺體火化，身後事會一切從簡，「早幾日先收到食環署通知，話大仔嗰骨灰位中咗籤，等埋封信就可以揀位，仲諗緊點籌嗰幾千蚊，點知個細嘅又突然走埋……」阿琼表示，希望將兄弟二人的骨灰一同存放。
望着愛子的靈位和細仔送給她解悶的貴婦犬，昔日的往事不斷浮現眼前，她含淚稱自己已十分僥倖，兩兄弟從小到大一直循規蹈矩，從未行差踏錯，又敬重長輩，而阿鵬疼愛胞弟，死前還預留數千元給他學車，望胞弟能自力更生，兩兄弟生前均夢想可以組織一個圓滿的家庭，生兒育女，想不到最後竟狠心拋下母親。阿琼只能由衷期盼：「希望佢哋下世唔好再做傻事，凡事睇開啲、開心啲，下一世去好啲嘅家庭，唔好好似今世咁淒涼、咁辛苦。」
寄語年輕人珍惜生命
兩子都為情所困而失去生命，但悲劇已結束，愛恨將入土，琼姐表示不會埋怨任何人：「我唔會怪佢（阿俊女友），怪佢又點啫，個仔又唔會翻生！」她哽咽道：「自己咁後生，搵唔到咪搵第二個，就咁走咗根本就係自私，年輕人要珍惜生命，唔係為任何人，係為自己，死咗乜都冇！」
另外，自阿俊死訊傳開，一眾好友大為錯愕，紛紛在facebook上留言默哀，有好友慨嘆：「喺朋友最需要我嘅時候我不在，後果就係咁？」又有好友祝願他一路好走。
捐款編號：12466