政情：體院高招「預訂」下年捐款
慈善團體、公益機構競爭激烈，想搵到捐款真係要花啲心機，好似香港體育學院搵捐款都幾高招。話說體院尋日啱啱獲得西區隧道公司捐咗三十八萬元，贊助佢哋嘅「精英教練工作體驗計劃」，呢頭做完支票移交儀式，體院主席唐家成就即刻「打蛇隨棍上」，暗示問西隧主席莫偉龍出年會唔會繼續捐錢，搞到莫偉龍都即時大笑，答應出年會繼續捐款畀體院咁話。
西隧捐出馬拉松回贈
其實西隧捐畀體院嘅呢三十八萬元，都係因為早前一年一度嘅馬拉松活動途經西隧，西隧收到相關機構嘅款項「回贈」，於是就將呢筆由體育活動所得嘅款項，捐番畀體育機構，支持體育活動。莫偉龍尋日就去到體院，將呢張大支票移交畀唐家成，點知唐家成剛剛收完支票，就即刻笑住用英文問莫偉龍：「出年都應該繼續會有馬拉松，咁你會點處理明年嘅錢呀？」即係暗示想西隧出年都捐款畀體院啦！
莫偉龍都相當大方，笑笑口話：「出年我都會喺度（移交捐款支票）」，引來全場大笑。今年啱啱先收完捐款就可以搵定下一年捐款，體院搵捐款真厲害呀！