立法會幾位議員組隊參加維港渡海泳，話咁快喺下星期日就到比賽日子，早前成功通過「試水」嘅紡織及製衣界議員鍾國斌（Felix），近日加緊訓練備戰，每兩日就游一次千五米。Felix話，好彩近期經常坐黨友嘅遊艇出海，先至可以有機會進行特訓，但遊船河又關游水咩事呢？
原來Felix話每次坐遊艇出海並唔係玩樂，而係當遊艇駛到海中心嘅時候，佢就一支公跳落海游去附近沙灘，來來回回游足千幾米先上番遊艇。
Felix話，泳池同大海係兩個世界，如果唔識游大海，喺泳池游到幾叻都無用，所以每逢黨友出海，佢都必定會到，當係熟習大海水性。
Felix最近為咗幫業界喺緬甸設立港商工業園，連暑假都要飛來飛去，佢估計飛多一次去緬甸就可以同當地政府正式簽約，仲話今次港商工業園好受廠商歡迎，其中一間屬藍籌股嘅廠商仲同Felix講，希望可以留番個大位畀佢設廠喎。