政情:大劉語無倫次? 一時話嚇大 一時話被姦

捲入澳門世紀巨貪案嘅華人置業主席劉鑾雄(大劉)聲稱因病而唔去澳門受審,但就經常精神奕奕去灣仔富豪飯堂開飯,最近仲一連兩日喺飯堂發表偉論,期間欲語還休,唔講又講,一時話有人陷害佢、屈佢、被人霸住財產,一時又揚言「預咗被人喺街亂刀斬死」。尋日又有新言論曝光,大劉自稱由細嚇大,但同時又喊驚話自己被逼到走投無路猶如被強姦,要扮高潮先至放你走,佢嘅說法咁矛盾,真係唔知信唔信佢好!

大劉自從官司纏身後一直三緘其口,但近日就一反常態向個別傳媒爆大鑊,但講嘢十足斷橛禾蟲,有一句無一句,唔知想帶出啲咩訊息。及至剛過去嘅周日,大劉再現身富豪飯堂,但今次收晒口無出聲,反而臨離開時唔留神幾乎仆親,直到尋日最新「驚喜」反而係佢早前同個別傳媒嘅對談內容曝光。

其實大部分對談內容都係老調重彈,包括大劉話想開拍佢經歷嘅《張子強與大劉》、「預咗畀人喺街下亂刀斬死,或者亂槍殺死」等,較為新鮮嘅內容係佢自言四歲開始已經「嚇大」,「否則心臟病死了」,其後又左一句唔怕、唔驚死,死有輕於鴻毛、重於泰山,又話「曼德拉都坐咗廿七年政治監,我問心無愧」。

「要扮高潮先可以無事」

不過,大劉口講唔怕死,但同一時間又喊驚連連。佢宣稱起初不想投資,畀咗大筆錢人哋都要「撕佢票」,又自稱被逼到走投無路猶如被人強姦,「你一定要扮高潮,先可以無事走得,如果你叫救命,就殺你全家,誅你九族」,形容呢個係「白色恐怖」喎。

聞「被人搶地」 即打噴嚏

大劉講到天花亂墜,都唔知信唔信佢好,最為一致嘅舉動係幾乎日日都精神奕奕現身富豪飯堂。話說佢尋日中午約十二時半,由司機接載到飯堂落車,然後匆匆進入酒家,直至下午一時四十五分先離開。當問及「劉生你係咪被人搶地皮」,大劉聞言一語不發,仲打咗個噴嚏添,唔知呢個噴嚏又暗示啲乜嘢,透露乜嘢玄機呢?

不過,講到底如果大劉真係有咁多「內幕」要爆,理應到澳門應訊一五一十交代清楚至啱,否則縮埋喺香港翻來覆去,鍾意講就講,唔鍾意講就唔講,咁又有乜用處呢?

第一手消息請下載on.cc東方互動iPhone/iPad/Android/Windows Phone Apps