十六名副局長同政治助理將於下周二（廿四日）起、展開為期五日嘅北京同湖北訪問行程。呢個訪京團可謂一波三折，先有特首辦主任邱騰華要跟隨特首出訪重慶，而令副局政助訪京團一度無團長；之後又爆出政務司司長政助張秀麗辭職，令訪京團多少蒙上陰影；最新挑戰係超級颱風「天兔」強勢撲港，未知能否如期出發，一眾團友只能望天打卦。
張秀麗尋日突然以照顧母親為由請辭，連同之前嘅發展局政助何建宗同勞工及福利局政助莫宜端，已經係今屆政府第三位劈炮唔撈嘅政助。不過據聞其實張秀麗個名，一早就唔喺訪京團名單之列，相信佢喺成團之前已經諗定唔做。
訪京團最初無司局級官員隨行，搞到一眾團友可能見唔到較高級嘅中央官員，亦因無得安排新聞主任隨團，令佢哋唔知點向傳媒發稿發相同安排記者會。隨着政制及內地事務局局長譚志源（Raymond）喺最後關頭加入訪京團，料佢哋最少可見到港澳辦嘅主要領導。但Raymond只逗留一日半，幫唔到之後嘅行程，因此佢哋就互選出傳媒出身嘅財政司司長政助羅永聰同食物及衞生局政助陳凱欣，「重操故業」充當今次訪京團嘅新聞主任，認真狼狽。