政情：議員歎慣縮暑假好難
新政府上場後對行政會議嘅開會制度大改革，包括將放暑假由過往嘅八星期減至兩星期。不過，郁啲都批評政府唔肯做嘢嘅一班立法會議員就依舊放足兩個半月悠長暑假，仲照樣逗人工，納稅人啲血汗錢就係咁白白浪費。有新丁議員質疑係咪有需要放咁長暑假，但有資深議員就聲稱會尊重傳統，唔同意縮短暑假喎，呢項議題確實值得社會深入探討。
立法會話咁快就放咗兩個半月悠長暑假，唔少議員都去完旅行返港，而且執埋相放上社交網站，但個暑假都仲未放完，認真爽。究竟立法會係咪真係要休會咁耐呢？我哋就此問過幾個議員意見。
支持：多開會爭政績
今屆新當選議員陳志全（慢必）就話，雖然立法會放暑假係傳統，但其實就算冇暑假，部分議員都會喺新年、復活節、聖誕節等自行放假去旅行，所以放一個月暑假都夠晒啦。
慢必又話，原本想繼續喺立法會「狙擊」捲入涉利益衝突嘅發展局局長陳茂波，但因為立法會要放暑假，有關計劃都要被迫停一停。加上休會前佢原本想提嘅動議都抽唔中，予人感覺好似冇做過嘢咁，所以佢都贊成開多啲會，仲話唔介意做醜人，要求縮短暑假咁話。
反對：趁空檔可落區
不過，唔係個個議員都捨得放棄悠長暑假，資深議員譚耀宗就話，其實立法會放暑假啲時間都唔會嘥，因為議員可以趁呢段時間落區，加上依家立法會工作多咗，一班秘書處職員都可以趁冇會開去抖抖氣。佢仲話，就算人唔使抖，立法會大樓都要有時間維修咁話。
議員石禮謙一聽到縮短暑假就即刻話，「我不嬲都好尊重傳統！」所以唔同意縮短暑假。不過，佢認為就算有人建議縮短暑假，喺咁嘅政治環境下，其他議員都唔敢話唔想開咁多會喎。
對於縮短暑假，就連議員梁國雄（長毛）都唔多積極，仲話改會期又要攞上議事規則委員會討論，好高難度咁話。其實長毛唔想縮短暑假都唔出奇，事關佢經常都喺立法會長時間「拉布」，想落區都難啦，所以暑假有空間畀佢落區拉票嘛。