中環出更：饒宗頤榮任法外籍院士
蜚聲國際嘅國學大師饒宗頤多年來屢獲中外院校頒授殊榮，佢尋日又榮任法蘭西學院銘文與美文學院外籍院士。據悉外籍院士係該院海外院士中嘅最高級別，饒宗頤更係亞洲首位獲得此榮銜嘅漢學家。佢坦言，對此感到受寵若驚。
漢學推動者 題字回禮
尋日饒宗頤親身出席於中文大學利希慎音樂廳舉行嘅授職儀式，該院終身院士傅飛嵐及該院常任秘書長Michel Zink教授專程來港，向佢頒授院士劍、證書、院長令及獎章。寶刀未老嘅饒宗頤望落精神奕奕，佢為答謝對方專程遠道而來，仲親筆題字送畀對方添。
中大校長沈祖堯致詞時話，饒宗頤同中大嘅淵源超過一個甲子，當年佢就讀新亞書院，畢業後曾擔任中文系講座教授及系主任等職位，主持過竹簡、帛書出土文獻資料庫同甲骨文金文資料庫嘅研究計劃，取得重大成績。據稱，饒宗頤喺上世紀五十年代已認識當時嘅歐洲漢學權威戴密微，從此與法國漢學界建立學術及友誼關係。
卓妮