政情：公民講場：卿陪涂仁衰 民望齊急挫

上個月國泰款待立法會議員去法國接新機，單嘢惹嚟滿城風雨，佢哋唔止因為回水而荷包大出血，有份去款待團嘅民主黨何俊仁同涂謹申，民望都一樣大出血。香港研究協會今個月四至十二日，用電話訪問咗一千二百五十一人，對比上兩個月，分別下跌零點二分同零點一九分。對於豪遊法國，民主黨主席劉慧卿為個黨止血，要求何俊仁同涂謹申道歉同回水，但佢自己嘅民望都急跌零點六四分至二點五五分，跌幅係眾多直選議員之最，何俊仁同涂謹申真係佗衰家嘞。為咗補鑊，卿姐去信內務委員會主席，建議檢討議員接受海外訪問邀請嘅安排，研究係咪有需要加入限制，同埋修改議員申報個人利益機制。