政情：鄺漢生力撐港廉政制度
近排香港廉政形象飽受打擊，尤其是前廉政專員湯顯明被查出豪使公帑，又將飲酒文化帶入廉署，其中仲有兩宗涉及刑事調查線索，令人氣餒。退休後開設工程管理諮詢公司嘅前工務局局長鄺漢生，近年幫內地唔少大型工程做項目管理，當中包括防貪，多年來見慣內地貪腐亂象。佢話相比內地嘅情況，香港嘅廉政制度仍然有效，大家唔使太悲觀。
前工務局長 助內地防貪
早前我哋喺一個場合見到退休多年嘅鄺漢生，佢睇落精神唔錯。自從香港國際機場落成啟用後，佢就功成身退，三年後做返老本行，早幾年進軍上海，將佢累積多年嘅經驗化為一套工程管理系統，包括上海地鐵都搵佢幫手。鄺漢生話，大型工程項目涉及龐大資金，可以話通地都係錢，成本控制係項目管理嘅重點，自然同防貪息息相關。
講到防貪，鄺漢生認為香港最近爆發嘅廉政醜聞，證明廉政制度仍行之有效，至少香港仍有制度查清真相，反觀若喺內地，好難咁有系統查個清楚。