政情：「數碼蘇」學足喬布斯
問責官員應該發揮政治能量，同市民拉近距離。尋日商務及經濟發展局局長蘇錦樑（Greg）主持「數碼21」資訊科技策略公眾諮詢文件發布會就搞搞新意思，向已故蘋果教主喬布斯（Steve Jobs）偷師，搞到發布諮詢文件好似蘋果產品發布會咁。
發布諮詢文件狂篤板腦
阿Greg雖然着住西裝出場，但就特登唔打呔，打扮休閒，坐喺張高櫈度談笑風生，仲攞住部平板電腦不停「篤、篤、篤」，學晒喬布斯咁。佢一面講嘢，一面對照後面嘅短片，向在場傳媒講解依家資訊科技有幾發達，香港市民喺邊方面可以用到資訊科技改善生活質素。佢仲喬布斯上身咁加入唔少身體語言同手勢，希望演講更加精采。
雖然阿Greg點落力，都好難有好似喬布斯咁嘅神級演講表現，何況照抄都只係A貨，點都不能超越，但都叫做有個新嘗試，政府仲好有誠意咁拍咗幾條短片，唔知吸唔吸引到市民睇呢？