中環出更：徐立之怪疾 「眼前一白」
香港大學校長徐立之早前最後一次主持港大嘅開學禮，佢十一年嘅港大校長生涯即將完結。不過唔講唔知，原來徐校長雙眼一直有唔尋常眼疾，雙眼不時會眼前「一白」睇唔到嘢，要幾秒鐘至可以回復視力。
話說徐校長日前出席一個活動，致詞時卻忽然睇住份講稿都食晒「螺絲」，同平時出色表現大相逕庭，後來徐校長向卓妮解畫，原來佢多年前已患上奇怪眼疾。佢話，當年佢因為額頭皮膚敏感求診，醫生話佢係壓力大所致，開咗支類固醇藥膏畀佢搽患處。點知有次佢搽藥膏時不慎入眼，令視網膜受損，自此「眼前一白」情況不時發生。佢話，呢件事喺港大已經唔係秘密，可能平時佢演講時一早背好晒稿，所以一直都冇「穿崩」。
嘆港大多名醫亦難治
話時話，徐校長壓力大，莫非同佢出任港大校長有關？佢就話絕無關係，事關件事喺十幾年前已經發生，當年佢仲喺加拿大研究緊分子遺傳學。佢嘆謂，雖然港大孕育唔少名醫，但佢嘅眼疾就冇得醫。徐校長又唔使咁灰嘅，醫學科技日新月異，要對未來抱有期望至得o架。
卓妮