中環出更：梁太有乖女伴逛街
今日係中秋，特首梁振英（CY）嘅細女頌昕爭取機會，喺香港同爸爸媽媽過埋中秋至返英國繼續學業。頌昕尋日同媽媽梁唐青儀一齊喺中環食午飯，之後仲一齊逛街，兩母女感情真好。
尋日下午約兩點鐘，梁太同頌昕孖住現身中環歷山大廈。唔少途人都認得梁太，但梁太毫無架子，大方點頭微笑。卓妮見有一政府座駕停泊於大廈外，司機正打開車門準備接載特首夫人，不過梁太並冇上車，反叫司機先開車離開，然後同囡囡返回歷山大廈。
頌昕高興留港共賀佳節
梁太同頌昕由歷山大廈穿過中環港鐵站步向置地廣場，再穿過一間國際名牌店，然後搭扶手電梯上三樓，顯然對中環好熟悉。原來佢哋嘅目的地係一間新加坡名袋專賣店，呢度主打七彩繽紛嘅鱷魚皮手袋，梁太嚟呢度攞番啲皮具。佢哋一踏進店內，店員隨即一擁而上招呼梁太，相信佢係嗰度嘅熟客。卓妮同佢哋傾咗兩句，頌昕話好開心，因為今年中秋可以留港同父母一齊過，兩母女最後喺置地廣場上車離去。
講起中秋，CY同太太上星期喺禮賓府舉行中秋園遊會，兩個女兒都有喺度，仲請咗智障人士同少數族裔人士出席，又有行政會議成員等，一共八十幾人，不知幾熱鬧。
CY好有心思，送咗怕醜草同蟋蟀畀小朋友做禮物。CY喺網誌話，呢啲係簡單易養嘅生物，小朋友都覺得好有趣。
卓妮