迪士尼樂園喺去年萬聖節,邀請多達十六名議員到主題樂園公園體驗黑色世界,活動設有晚宴,又畀參加者到場內玩鬼屋同提供免費泊車。不過,自豪遊法國風波曝光後,議員對任何商業機構嘅贊助款待都相當小心,有人更連每年中秋節前都會收到月餅券同果籃都唔敢收。其中資訊科技界議員莫乃光更喺事隔大半年後,為自己去年獲邀到迪士尼玩補做申報,可見佢哋依家幾咁驚青。
迪園今年唔邀試玩
有人近日收到風,指迪士尼決定下月唔再邀請議員試玩哈囉喂活動,難免令人聯想係同豪遊法國風波有關。迪士尼樂園發言人接受查詢時就強調,佢哋今年本來就無計劃舉辦有關活動,與豪遊法國無關喎。