政情：大輝扭擰 玩殘接班人

黃家和施榮懷或參選

過去一年，由於不時傳出大輝會跳出功能組別，轉戰直選嘅風聲，所以廠商會內部亦有唔少人蠢蠢欲動，希望頂替大輝空缺，例如上屆已經密謀出選嘅飲食界人士、「金茶王」比賽嘅創辦人黃家和，近年就非常活躍廠商會嘅活動，相信佢絕對有意染指下屆立法會議席。

其實，廠商會亦流傳過由交際手腕靈活嘅副會長吳永嘉代表廠商會，但吳永嘉唔太願意，一早耍手又擰頭。而最有江湖地位嘅第一副會長陳淑玲，亦一早表明只想專心會務，做議員嘅嘢千祈唔好搞佢。反而現任會長施榮懷明年年底即卸任會長一職，呢幾年佢漸漸為人熟悉，亦成功令廠商會年輕化，到底佢會唔會轉做廠商會代表議員，據聞佢自己都無閂後門，只係話第日嘅嘢無人知。

往績唔差 坐多屆亦得

不過，如果大輝留喺廠商會，咁一切都唔使變嘞。據悉廠商會中人認為大輝過去幾年表現唔錯，雖然佢不時用金句串爆政府，但喺業界議題方面交足功課，如果佢想坐多一屆，應該無乜人反對，但唔少人都希望佢早啲決定，以免阻住其他人接班。我哋問大輝點睇，佢就依然一貫地好瀟灑咁款，話傳聞嘅嘢無必要回應，到時就會知佢選定唔選喎。

除咗議員位置，施榮懷個會長職位明年底亦夠鐘起身，相信佢個位亦有排爭。因為廠商會同其他商會唔同，次次選舉都明刀明槍分成幾批，無話私底下協商，究竟邊個做下屆廠商會話事人，目前都分成兩大派別。有人覺得陳淑玲唔肯做議員，但做會長就啱晒，又話以佢資歷級數，絕對壓得住場，但陳淑玲有無興趣就唔知，有人就話第二副會長李秀恒都係可能人選。到底最終會長一職花落誰家，相信明年初會有啲眉目。