中環出更：巨貪案今續審 大劉食飯當開庭？
華人置業主席劉鑾雄（大劉）與南華足球隊足主兼商人羅傑承捲入澳門世紀巨貪案，今日喺澳門初級法庭續審，澳門廉政公署人員將繼續作供。由開庭至今以患病為由拒出庭嘅被告劉鑾雄尋日精神奕奕同家人去灣仔一間富豪級飯堂食晏，被問到會否出庭，佢照樣封口唔回應，唔通佢真係繼續「食飯當開庭」？
被問會否出庭 照舊唔答
尋日晏晝一點，剪咗頭髮嘅大劉現身灣仔，甫落車就飛快走入「飯堂」開餐，行動健步如飛，其後劉嘅女友甘比、一對仔女及劉媽媽亦到「飯堂」會合大劉。提到今日係咪出庭應訊，大劉依然十問九唔應，拒絕回答。
劉鑾雄同羅傑承涉嫌以港幣二千萬元賄賂澳門前運輸工務司司長歐文龍，以獲取華置旗下澳門樓盤「御海‧南灣」五幅土地嘅批給，被控以行賄及清洗黑錢罪，案件六月中開審，但劉鑾雄一直聲稱有病，無去澳門應訊，只派女友呂麗君到法庭聽審。
卓妮