保育團體一向反對市民食用魚翅，政府尋日就宣布，限制日後公務員喺酬酢活動中食用魚翅、藍鰭吞拿魚、黑苔（髮菜）及其相關食品，以樹立良好榜樣，推動可持續發展。魚翅與藍鰭吞拿魚同樣價值不菲，巧合嘅係「貪湯」前廉政專員湯顯明喺任內豪花公帑酬酢醜聞備受批評，嚴重打擊廉署嘅威信同香港嘅廉潔，莫非港府今次想以環保為名，一洗歪風為實？
政府發言人話，港府承諾喺公務酬酢活動中以身作則，帶頭採用高於《瀕危野生動植物種國際貿易公約》所訂定嘅最低要求，喺公務宴會菜單中剔除魚翅、藍鰭吞拿魚同髮菜，原因係以上三種物種被人以不利生態、無法以持續發展嘅方式捕獲或收割。
至於點解只剔除以上三種食品，港府就解釋話，未能將所有引起關注嘅食物一一盡錄，所以就以此作為一個開始，政府會繼續留意綠色生活趨勢，不時更新有關清單。除咗公務酬酢活動外，港府仲鼓勵政策局及部門屬下嘅公營機構都齊齊響應。其實飲酒對健康都唔多好，唔知港府幾時一併取消埋呢？