政情：陳年「佳」作 重見天日
近年來，青年人喺社交媒體上發表意見無遠弗屆，泛民主派更係當中嘅佼佼者，善用社交平台去動員支持者發表意見，政府都絞盡腦汁睇吓點可以更好咁同佢哋溝通，其中前中策組首席顧問劉兆佳（佳叔），早年委託多間大學做過青年研究。不過，佳叔呢項研究到今屆政府先至重見天日，策略發展委員會就疑似翻用呢條舊橋專門講「八十後」同社交媒體嘅相互關係，明顯係想亡羊補牢打好媒體網絡戰。
四研究涵蓋教育就業發展
策發會秘書處尋日向立法會提交文件，談及青年人教育、就業同發展機會，其中好多內容都新意欠奉，包括「八十後」同「九十後」面對樓價高企未能置業，向上流動機會同期望不相符等問題。反而最新鮮內容係首度公開佳叔年代嘅中策組委託機構做嘅青年研究，由官方角度總結青年人最新取態，包括「八十後」對建制有較多批評，更信奉民主同更重視保育環境；善於使用互聯網，喺制訂政策時點利用互聯網同其他網上平台作全民諮詢等。
文件其後又專門講到「社交媒體」，承認社交媒體令青年人更多參與公民同政治活動，又指青年人容易即時取得大量資訊，但消息來源分散，導致所知的僅為零碎嘅訊息，「青年人未必能核實從社交媒體所得資訊，亦可能無意中使用或傳播虛假消息」，就此建議政府應探討如何利用新媒體了解並同青年人有更多溝通，以取得有用資料協助制訂並推動青年政策。
中策組話仲有參考價值
本來官方肯正視青年人嘅意見理應值得肯定，但如果細心留意四個青年研究，就會感覺到好似有啲滯後，因為當中有兩個研究分別喺二○一○年五月同十二月完成，距今有約三年之久，似乎有「活化」舊橋當新招之嫌。再者，如果上屆政府有落實研究嘅話，相信未必導致今時今日政府眼中嘅失控景況。
有中策組人士重申，儘管社交媒體形態日新月異，基於上述四個青年研究結果分析同依家分別不大，有關研究結果仍有參考價值，而且對外公開亦可以增加透明度，所以認為做法合適，唔覺得有乜問題。估唔到佳叔嘅陳年舊貨，中策組都當寶。