政情：長安會「見紅」 周永健揼心口
提供「平安鐘」服務嘅長者安居協會，最近獲賽馬會慈善信託基金「泵水」七千萬元，喺何文田愛民邨商場另設樓高三層、佔地四萬平方呎嘅新總部，尋日正式開幕。協會創立十七年都以自負盈虧形式營運，過去一直相安無事，但近兩年盤數開始「見紅」，有乜方法解救？咁就要問問馬會董事周永健。
新總部有「茅廁」「柴房」
政務司司長林鄭月娥為開幕致詞時提到，一向有盈餘嘅長者安居協會最近兩年開始出現赤字，主要因為租金等成本上升所致。之後輪到周永健代表馬會致辭，主動提起自己亦笠住「領匯董事」頂帽，好識做咁自揼心口，應承維持協會喺領匯旗下商舖未來幾年嘅優惠租約，協會唔使周圍撲水就最開心喇。
講開新總部，協會為咗同長者住戶較多嘅愛民邨融為一體，特別為總部注入唔少「老香港」情懷，除咗擴充廿四小時呼援及關懷服務熱線中心，有一百五十人同時接聽電話外，仲將洗手間、儲物室時光倒流叫「茅廁」、「柴房」添！