政情：羅志賢夥飲食界開酒吧
酒吧係三五知己相聚嘅好地方，尖沙咀赫德道尋日就開咗間高格調嘅JC CAFE & BAR，原來係金孚汽車董事羅志賢伙拍飲食界陳少雄及陳嘉豪（Paul）兩父子、林道明、杜敏聰一齊創辦嘅，一眾股東齊齊出席開張剪綵儀式，仲請到王馨平、劉丹、林漪琪、黎瑞恩等藝人到賀，人潮攻陷整條赫德道！
陳少雄曾投資敦煌酒樓，今次將新店交畀兒子Paul打理。Paul話，九十年代嘅尖沙咀曾經好熱鬧，惟近年舖租急升，唔少酒吧都搬到樓上舖令氣氛大減，顧客紛紛轉往光顧中環蘭桂坊一帶酒吧。所以，佢哋由蘭桂坊嘅名餐廳請來整個班底，希望將中環嘅優質環境、音樂、食物、氣氛等高格調品味帶進尖沙咀。
主打時尚高格調路線
據知面積三千呎嘅酒吧主打時尚及高格調路線，花近一千萬元豪裝，有可容納近三十人嘅貴賓房，又設有獨立貴賓區加強私隱度。酒吧中央嘅華麗舞台，將邀請樂隊駐場演出，並設有特大銀幕供球迷欣賞賽事。