政情：貪曾禮賓府似監獄
「貪曾」前特首曾蔭權爵士任內政績欠奉，最為人熟識就係貪小便宜事迹，而佢篤信風水亦係公開嘅秘密。據聞貪曾入住禮賓府之前，有傳佢搵過風水師傅睇風水格局，將禮賓府嘅外牆塗上灰色。原來灰色喺玄學上有特別作用，而灰色亦同法院、監獄等同一種顏色，莫非冥冥之中有主宰，貪曾想提早習慣生活喺灰朦朦嘅環境？
當年貪曾水鬼升城隍，好招積吹住口哨做特首，可恨嘅係佢任內七年一事無成，房屋、貧富懸殊等深層次矛盾不斷加深，視民望如浮雲。做好事欠奉，揮霍公帑等衰嘢就街知巷聞，廣為人知就係佢動用過千萬元公帑豪裝禮賓府，包括花幾十萬元建兩個風水錦鯉魚池，據聞就連禮賓府外牆顏色佢都要求多多。
屬「靜色」 住臭脾氣
有知情人士爆料，貪曾入住禮賓府後，就要求將禮賓府外牆塗上灰色，同現任特首選用嘅白色外牆好唔同，究竟當中有乜玄機呢？莫非貪曾鍾意灰色地帶？堪輿學家李丞責話，灰色本身係「靜色」，屬於隱藏顏色，係用咗會令人收斂脾氣，比較安靜啲，事實上法院、監獄等都係較多用呢種顏色。至於白色方面就較為樸素，白璧無瑕，但「容易有瑕疵」，所以主人希望做到公正嚴明，並且有所承擔喎。
李師傅真係一矢中的，大家都知貪曾出晒名小器兼臭脾氣，選用灰色㩒住啲臭脾氣，希望有所收斂，真係夾到絕。再者，灰色巧合地同法院、監獄等外牆顏色類同，呢方面或者有啟示都未定。眾所周知，貪曾任期末貪盡海陸空、歎盡省港澳，如今廉署調查已近完成，莫非冥冥之中有主宰，貪曾要適應定生活喺灰色嘅環境？
「廢鑊」同道人 醜事不絕
講開信風水，據聞前食衞局局長周一嶽同貪曾都係同道中人，佢甚至連身邊人嘅房間布置都要過問。不過，搞咗連串風水大龍鳳後，周任內依然被批「每周一鑊」，咁就反映出風水唔係萬能，最緊要個人有料到至得。