中環出更：楊釗無懼「思想癌細胞」
發展局局長陳茂波早幾日嘅一篇網誌，被質疑有意打郊野公園土地嘅主意，連被視為「梁粉」嘅天文台前台長林超英，亦形容徵用郊野公園起樓係「思想癌細胞」、「諗都唔可以諗」。不過，中華總商會（中總）會長楊釗就另有高見，指一般人身體都有抵抗力，就算平時食嘢有細菌落肚都唔會有事喎。唔通楊釗覺得郊野公園少咗，香港人都冇事？
指港人夠抵抗力
楊釗引用政務司司長林鄭月娥早前提出，只要開發本港百分之一嘅土地，已經可以建屋容納一百萬人。佢認為百分之一只係好細嘅數字，「對環境影響唔係好犀利啫！」，但已可解決香港住屋難題，年輕人易啲上車、劏房又少啲，港人只不過「享受少一啲」，相信有足夠抵抗力撐住，更反諷林超英嘅「癌細胞」係咩道理？楊釗又申報利益，話自己一樣鍾意行山，但係都希望大家唔好一開始就對議題講「NO」喎。
另外，中總早前同政制及內地事務局約好就政改方案會面，對於部分泛民政黨堅持透過「公民提名」普選特首，楊釗就以一家人去阿爺屋企食飯為例，「有個兄弟扭計唔食，其他人咪一樣照去阿爺度食！」唔知佢係咪暗示泛民跟唔跟大隊都無所謂呢？
卓妮