中環出更：應家柏置裝待發 備戰渣馬
做咗香港賽馬會行政總裁六年多嘅應家柏（Winfried），一生都與「馬」結緣，除咗鍾意賽馬運動之外，原來仲係馬拉松長跑好手。Winfried年輕時喺德國做過職業足球員，跑十公里可謂冇難度。卓妮日前喺金鐘太古廣場一間運動用品專賣店，遇到佢同太太Winnie拍拖購物，二人揀完跑鞋又睇運動衫褲，似乎一副戰鬥格咁喎！
與妻拍拖買跑鞋滿載歸
當日下午五點半鐘，一身藍色西裝嘅Winfried，同太太Winnie孖住現身運動用品專賣店，店員熱情上前招呼。此時應家柏已經急不及待走到跑鞋貨架前，拎起顏色鮮艷嘅跑鞋逐一研究，之後又要求試着，感受吓對鞋嘅舒適度，Winnie就喺側邊不時畀意見。揀定心水跑鞋之後，Winfried不忘揀番件型仔「戰衣」，最後滿載而歸。
卓妮上前同Winfried打招呼，佢話正打算報名參加明年初舉行嘅渣打馬拉松十公里賽事，依家已經要開始備戰，所以買定跑鞋同「戰衣」操fit自己。佢自爆話，當年做職業足球員時參加十公里賽事，曾做出三十二分鐘嘅最佳紀錄，同世界紀錄保持者嘅二十六分鐘，只係相差六分鐘，認真犀利。
Winfried笑言，雖然依家年紀大咗，體能冇以前咁好，但佢依然定期操練，務求保持喺四十六分鐘內完成十公里嘅水平。咁都未夠，佢話嚟緊目標係參加「半馬」，希望喺一小時四十五分鐘內完成二十一公里賽程喎。
卓妮