中環出更：梁錦松雲南行伏明霞冇得跟
國際小母牛香港分會主席梁錦松、太太伏明霞（Michelle）等城中名人，早前現身上環一間米芝蓮星級食肆，為小母牛年度籌款晚宴助陣。阿松話，佢後日將率團到雲南少數民族村落探訪農戶，一向夫唱婦隨嘅Michelle就冇得去，事關三個小朋友已開學，佢要留港照顧子女。
阿松話，自從○五年加入小母牛至今已八年，每年必定前往內地偏遠農村探訪，有時一年去三次咁多。雖然探訪旅途艱辛，不過佢好享受，尤其是第二次回訪時感觸更深。佢話，通常初次為受助農戶送上牲畜時，農戶表情總係徬徨無助，惟兩、三年後，牲畜繁衍下一代，受助者變成施贈者，成個過程唔止自己脫貧，仲可以幫番其他人，搵番自信心，令佢感覺好振奮。
小母牛籌款 名人紛行善
當晚同場仲有小母牛籌款委員會主席兼「快勞夾大王」杜振源（Simon）、副主席王庭聰、馬會大董葉澍堃及莎莎老細郭少明等人。即將披嫁衣嘅王庭聰女兒王麗霞（Crystal）亦同男友Jimmy拍拖到場，Crystal講起婚事喜上眉稍，下個月兩人將先喺香港註冊，明年初至移師印尼峇巴里島舉行婚禮，到時將宴請三、四十名親友飛去見證浪漫一刻。
同國學大師饒宗頤熟稔嘅王庭聰，出動大師寫下「量寬福厚」墨寶以供拍賣，成為當晚拍賣環節嘅高潮，連Michelle都舉手叫價。經過一輪熱烈競投，最後由善心爆棚嘅Simon以五十萬元投得。加埋一眾善長自揼心口競投美酒及鑽飾等，話咁快籌得三百五十萬元善款，認真飲得杯落。
卓妮