政情：李銘澤寸白鴿舉報當做騷
已退休嘅廉政公署前副專員李銘澤，尋日應民主黨立法會議員劉慧卿邀請出席網上電台節目。佢話根據經驗，廉署收到嘅投訴有三、四成都係有個人或政治目的，又表明完全唔支持有人大鑼大鼓向廉署舉報投訴，話會影響廉署調查，甚至涉案當事人可能會毀滅證據添。
林卓廷被摑一巴仍死撐
咁啱經常高調去廉署舉報投訴同評論案件嘅民主黨總幹事林卓廷都在場旁聽，聽到李銘澤咁講，真係攞彩不成反而被摑一巴，但佢仲死撐話李銘澤言論係站喺廉署立場，或者同政黨有不同角度喎。
另外，李銘澤早前炮轟特首梁振英（CY）嘅「道歉論」令廉署淪為政治工具。尋日佢再談及「道歉論」時就收晒火，唔認為CY就廉署工作講得太多，之後又認衰話自己離開咗廉署就唔應該出聲，承認「呢個我都抵打」。
當問及「貪曾」前特首曾蔭權爵士嘅貪腐案，李銘澤未有評論。至於曾共事嘅「貪湯」前廉政專員湯顯明購入大量藏酒，以及聲言唔知晚宴同酒水開支不可「分單」，李銘澤只係話，做咗咁耐嘅人應該知道自己嘅崗位喎。