張文韜升呢失敗
張文韜喺上屆政府跟住「好打得」嘅前發展局局長林鄭月娥做嘢，理應有大把機會學嘢，林鄭之後更上一層樓喺新政府出任政務司司長，但張文韜不但無得拉衫尾升呢做副局長，反而不獲續任黯然離開政府。去年九月立法會選舉前夕，有人重提部署張文韜落戶九龍西直選，黨內旋即有強烈反彈聲音，最後佢連排喺蔣麗芸名單嘅資格都無埋，依家既非民記中委亦非區議員。
張文韜落得如此下場，有人話係因為佢為官期間鮮有同民記中人打交道。有民記中人就以張文韜「升呢」失敗做例子，提醒依家喺政府做緊官嘅黨員，要好好把握呢幾年為官嘅寶貴機會，並且切忌忘本，否則將來落任時隨時會變成「張文韜二世」，政治前途從此玩完。