政情：「茶餐廳之父」獲法頒授勳帶
人稱「茶餐廳之父」嘅劉榮坡（坡哥），做茶餐廳做到揚名海外。日前佢獲國際地位崇高嘅法國美食會頒授院士勳帶，以表揚佢對飲食界嘅卓越貢獻。坡哥話，事前並唔知該會派出神秘顧客到佢旗下茶餐廳試食，直至個多月前忽然接獲得獎通知，感到非常驚喜。
當日坡哥同太太劉黃鳳玲、大仔劉伯輝及細仔劉伯雄齊齊現身，坡哥笑言，有兩個仔繼承衣鉢，自己可安心退休，仲有五個孫等住佢湊。法國美食會駐遠東區主席古載禮親自到場，以獨特嘅儀式，將勳帶頒到坡哥身上，並取出兩把伸縮銀劍，一把畀坡哥揸住，一把就放在坡哥右邊肩膊上，狀似「行」住坡哥，以示典禮嘅神聖同莊嚴。
大嘆難請人 有工冇人做
坡哥坦言，近年茶餐廳好難請人，唔少年輕人嫌形象太基層，搞到有工冇人做。佢日前同餐務管理協會主席楊位醒茶敍講起，忽然靈機一觸，舉辦首屆茶餐廳青年廚師烹飪比賽，鼓勵薪火相傳，並改善大眾對「廚房佬」、「點心佬」嘅舊印象。