中環出更：傳朱敏健延任監警會秘書長
獨立監察警方處理投訴委員會（監警會）除咗主席外，其他委員都係每兩年一任，所以委員即將喺明年換屆，與此同時，秘書長咁啱亦會喺明年換人。咁啱秘書長朱敏健最近指早前旺角行人專用區舉行嘅撐警方集會係「政治活動」，結果收到幾百個投訴，被質疑「未審先判」，究竟事件會否導致佢被叮走呢？據聞朱敏健不但無事，仲好大機會延任兩年，主因係佢同委員合作無間。
被指與今屆委員合作無間
有了解監警會運作人士透露，其實喺朱敏健發表「政治活動」言論後，監警會內部已有唔少聲音，覺得佢喺事件上的確講得太多。不過，亦有唔少委員認為佢同今屆委員間合作無間，而且考慮到監警會內部分工好有條理，就算要成立獨立委員會嚟調查事件，同朱敏健有冇能力再擔任秘書長係兩碼子嘅事。加上要等獨立委員會得出調查結果，都係一年後嘅事，所以搵朱敏健連任秘書長係最好嘅安排喎。不過，即使延任安排過得監警會委員嗰關，又會唔會再令監警會收多幾百宗投訴呢？
卓妮